2Pe 3 | MHL | STEP | Aria emar unowik, yo aakisa parosifa nia siisimomiyem fain-ke erup ariya. Ni sira kakeniw ikowa nain kema iikirap kema suuweka naep nia naiyem. Nain nia kemapawowa naep parosifa fain siisimiyem, ne iiriw siisimem nain pun naap.

2 Peter 3

Yiena Maneka ikoka nainiw ekapinen naek

1 Aria emar unowik, yo aakisa parosifa nia siisimomiyem fain-ke erup ariya. Ni sira kakeniw ikowa nain kema iikirap kema suuweka naep nia naiyem. Nain nia kemapawowa naep parosifa fain siisimiyem, ne iiriw siisimem nain pun naap. 2 Wi iiriw profet opor unowa maem-ikemik nain kema suuweka, ne opora yiena Maneka eena yia aawow mua nain wi aposel wia maakeya nia maakemik nain pun kema suuwam-ikeka.

3 Ni uru-urufap, fain baliwep akena mokakeka, feenap, miiwa weeserow epa arem-ikaeya wi mua papako wiena wadol sira ookimik nain-ke i maa makena maemi ookimik nain yiar amap-niirikuan. 4 Feenap maikuan, “O nainiw ekapowa maek nain makena ekapok-i? I yiena auwa teeria o arewap ikemik nain iiriw umemik. Nain maa unowa ona iiriw miiwa onaiya imenarek naapiw akena ikomakek,” naap maikuan. 5 Naeya wi nain maemi Mua Maneka miiw maa muutitik urufam-ikaiya nain kema suuwowa miatinimik. Feenap ikua, Mua Maneka-ke maeya aapereka ne maa muutitik imenaromakek. Ne epa unowa nain eka-ke muep ikaeya os-ke eka nain suuw-ekap kame kuisow wueya miiwa imenarek. 6 Ne naap ikok eka nain-keriw miiwa muemi emeria mua wia samorak. 7 Ne aakisa miiwa i ikemik fain Mua Maneka ona naap maep miiwa fain urufam-ikaiya. Wiimar iiwawun, emeria mua wia mekawow epa-pa os-ke mukuna sesekeya miiwa fain kukumakinon. Ne wi o me ookimik nain iiwawun samorarep mesenalikuan.

8 Nain emar unowik, ni maa kuisow fain kema suuwam-ikeka. Mua Maneka i saarik fofa me tuuniya. Feenap, fofa kuisow mokoma unowa akena naiya, ne mokoma unowa akena fofa kuisow naiya. 9 Ne ona ekapowa maek nain i mua-ke maimik, ewur ekapekak oo. Nain feenap, ni me samor aaweka naep nia arewiya. Ni unowiya iiwawun kema kiriwkin maa nain onap-puinon. Naapeya mokoma tuunowa maimik nain o weetak.

10 Yiena Maneka ekapow fofa nain oram imenarep-puinon, ikum mua saarik. Iir nain aapereka wilik naemi paranemi iiwawun mesenalinon. Neemi maa unowa aapereka-pa ikomakek nain awemi samorarinon. Ne maa muutitik miiwa-pa ikomakek nain pun iiwawun awemi mesenalinon.

11 Miiwa ne iinan maa unowa ikoka Mua Maneka maek naap akena samorinon. Ni nain kema suuwami aakisa sira kamenap ikowen? Ni Mua Maneka fofa maek nain arewami ewur ekapinok naem-ikok osiw ookami baliwep ikowa-ke eliwa. Makena, fofa neeke aapereka maa unowa mukuna-ke kuumeya awemi iiwawun samorarinon, ne miiw maa muutitik awemi eka aremi mesenalinon. 13 Nain Mua Maneka eena owow iinan enuma ne miiw enuma yia maakep koonowak. I owowa eena anane kakeniw ikowa nain neeke ikowa arewap ikaimik.

14 Naapeya emar unowik, ni fofa nain arewami Mua Maneka mokoka-pa pina marew akena ikaiyen naeka. Neemi o wameiya kema epaskun ikau naep naap topialem-ikeka. 15 Yiena Maneka miiwa ewur me samoriya nain kema suuwap feenap maeka, i iiwawun yia aawowa naep naap onak, naap maeka. Aria i uuwow epaskun Pol Mua Maneka-ke amisa iweya ni parosifa nia siisimomami nain pun maek. 16 O parosifa unowa nia siisimomak nain maa nain maemi opora kuisow fainiw nia maakek. Opora eena maek nain ara papako kemena wiar aawowa yoowa. Ne wi mua amis marewa ne Mua Maneka opora wiar ookowa me kekanimik nain-ke Pol opora nain wiar maemi kiri-kiripimik. Mua Maneka opor unowa nain pun naapiw onimik. Wi mua nain maa anima mia-pa wiam wuap-puamik.

17 Aria emar unowik, ni maa nain iiriw amisareman. Naapeya ni niam uru-urufami, wi mua eena sira puukimik nain-ke me nia oro-boonowuk. Naeya ni aakisa eliwa ikaiman nain naap akena ikeka. 18 Yiena Maneka Yeesus Krais eena yia aawok nain nia kemalep nia asipam-ikaiya naap manekarem-ikainok, ne ni amisa wiar aaweman naapiw ikim-ikeka. Aria o kekanowa ne unum maneka aakisa naap ikaiya, ne anane pun naap ikainok. Makena.